سوال حل كرتے وقت:

• جواب كے شروع میں الجواب حامدًا ومصليًا لكھنا۔
• جواب لكھنے سے پہلے اللہ تعالی كی طرف رجوع كرنا اور جواب میں حق بات لكھنے كی اللہ تعالی سے دعا مانگنا،خصوصًا یہ دعا پڑھنا: «رب اشرح لي صدري إلخ»۔
• سوال پڑھنے كے بعد پہلے آپ خود اس كا جواب سوچیں كہ اس كا جواب كیا ہوسكتا ہے،اگر سوال كا كوئی جواب ذہن میں آجائے تو اس كو رف میں محفوظ کریں۔اس كے بعد كتابوں كی طرف رجوع كریں،اور زیادہ سے زیادہ فقہ كی كتابوں میں اس كو دیكھیں،صرف ایك كتاب دیكھنے پر اكتفا نہ كریں۔
• اگر سوال کسی تنازع سے متعلق ہو تو جواب کے شروع میں لکھنا کہ” اگر سوال میں ذکر کردہ صورتِ حال واقعتاً درست ہے تو اس کا حکم یہ ہے“۔
• كئی كتابوں كو دیكھنے كے بعد جس كتاب كی عبارت زیادہ جامع اور واضح ہو،مستند اور معتمد ہو،جواب كے لیے اس كا انتخاب كرنا،اس كے بعد اس عبارت كی روشنی میں سوال كا جواب لکھنا۔
• ابتدائی دس استفتاءات کی اصلاحِ اول اپنے ہاتھوں سے صاف اور خوشخط لکھنا اور اساتذہ کی طرف سے مکمل تصویب کے بعد لیپ ٹاپ سے لکھ کر پرنٹ نکالنا۔
• اصلاحِ دوم کی صورت میں خوشخط لکھنے کے بعد پہلی والی اصلاحی کاغذ بھی ساتھ لانا۔
• پرنٹ نکالنے سے پہلے متعلقہ استاذ کو لیپ ٹاپ میں دکھانا تاکہ پرنٹ نکالنے سے پہلے اس میں سے غلطیاں دور ہوجائیں۔
• عربی اور اردو كے مشكل اور مصطلح الفاظ استعمال نہ كرنا، مثلاً مشتری، مبیع،طلاقِ مغلظ، ثمن، خیارِ شرط وغیرہ، بلكہ عام فہم آسان اردو میں جواب دینا۔
• كاغذ كے دونوں طرف حاشیہ چھوڑنا، عربی عبارت اقتباس كی شكل میں لكھنا۔
• كم از كم تین یا چار عربی فتاویٰ جات (فتاوی شامی،الہندیہ،البحرالرائق،بدائع الصنائع،تبیین الحقائق،فتح القدیروغیرہ) كا حوالہ دے کر عبارت نقل کرنا۔
• سب سے پہلے قرآن کریم کی آیت، پھر متعلقہ حدیث اس کے بعد فقہی کتب کا حوالہ دینا لیکن حدیث کا حوالہ دیتے ہوئے کسی شرح حدیث کی عبارت بھی نقل کرنا جس سے جواب کے مطابق استدلال موجود ہو،نیز اگر اس سے احناف کا مسلک ثابت کرنا ہوتو شارح حدیث بھی حنفی المسلک ہونا چاہیے جیسے عمدۃ القاری، مرقاۃ المفاتیح، تکملہ فتح الملہم، اعلاء السنن، بذل المجہود وغیرہ۔
• جواب لكھتے وقت اردو فتاوی سے مکمل اجتناب كرنا، البتہ جواب مكمل ہونے كے بعد مزید تائید كےلیے دستخط کروانے سے پہلے اردو فتاویٰ جات دیكھنا اور ان میں سے کسی مناسب فتاویٰ کا حوالہ دینا، یعنی امداد الفتاوی، امداد الاحكام، فتاویٰ دار العلوم دیوبند، فتاویٰ عثمانی وغیرہ۔
• صرف سوال میں ذكر شدہ مسئلہ كاجواب دینا،اِدھر اُدھر كی لایعنی باتوں سے گریز كرنا۔ کبھی مستفتی سوال کے ساتھ پورا واقعہ ذکر کرتا ہے، بنیادی بات مختصر ہوتی ہے صرف اس کا جواب دینا۔اختلافی مسائل سے گریز کرنا۔
• جس كاغذ پر سوال موجود ہوحتی الامكان اسی پر جواب تحریر كرنااورجب صفحہ ختم ہوجائے تو آخر میں (جاری ہے۔۔۔) لكھنا،اور اگر اس صفحہ پر جگہ نہ ہو،تو دوسرے صفحہ پر جواب لكھنا اور اس صفحے پر سوال كے بعد یہ لكھنا(جواب پشت پر ملاحظہ ہوں)۔
• حكم لگاتے ہوئے سخت الفاظ مثلًا: ناجائز ،مكروہ كی جگہ حرام كا لفظ ،فاسق یا گمراہ كی جگہ كافر كا لفظ استعمال كرنے سے گریز كرنا، اسی طرح شخصیات پر حکم لگانے سے اجتناب کرنا، نیز کسی خاص ادارے یا مکتبِ فکر کا نام نہ لینا،اس طرح بعض جگہوں پر جائز وناجائز کی جگہ موقع ومحل کے لحاظ سے”درست ہے، اور ”درست نہیں“ کے الفاظ بھی استعمال کرنا۔
• جواب اپنے الفاظ میں لكھنا ، کسی اردو فتاوی وغیرہ سے نقل نہ کرنا۔
• عام آدمی كے لیے مختصر اور عام فہم جواب لكھنا، البتہ كوئی عالم اور سمجھدار آدمی ہو،توزیادہ دلائل دینے میں بھی مضائقہ نہیں۔
• سب سے پہلے اردو عبارت پھر عربی حوالہ جات اس كے بعد آخر میں صفحہ کے بائیں طرف (والله أعلم بالصواب) اس كے بعد اپنا نام مدرسہ كا نام اور اس كے نیچے تاریخ لكھنا۔
• اپنے نام كے ساتھ كوئی لقب مثلًا: حقانی،عثمانی ،فاروقی، مردانی، افغانی ،دیوبندی،حنفی وغیرہ نہ لكھنا۔
• اساتذہ كے دستخط اور مہر لگانے كے لیے مناسب جگہ چھوڑنا۔
• اگر ایک سوال کے کئی اجزاء ہوں توجواب شق وار دیتے ہوئے ہر شق کے لیے الف:۔۔۔ب:۔۔۔وغیرہ لکھنا۔
• سوال میں مقصودی بات كو انڈر لائن كرنا۔
• تصحیح سے پہلے جواب رف كاغذ پر لكھنا۔